الدماطي: الأهلي يمر بمرحلة ضغط.. وعودتنا أقرب مما يتخيل البعض

أكد محمد الدماطي، عضو مجلس إدارة النادي الأهلي، أن الفترة الأخيرة شهدت حالة من الضغط الكبير داخل النادي، مشيرًا إلى أن الإدارة تدرك حجم المسؤولية وتسعى لتصحيح الأوضاع، مع التأكيد على أهمية دعم الجماهير ووحدة الصف خلال المرحلة المقبلة.

وكتب محمد الدماطي، عبر صفحته الشخصية بموقع “فيس بوك”: “بقالي حوالي شهر ونص قافل الفيسبوك وكل السوشيال ميديا تمامًا، وامبارح بس فتحت ونزلت صورتي مع الكابتن الخطيب كنوع من الدعم الأدبي لراجل عمل كتير للنادي وبيفضل النادي على نفسه، وله فضل عليّ بعد ربنا إني أكون موجود وأمثل كيان الأهلي العظيم”.

وتابع: “وفرصة بما إن في حالة هدوء حتى لو مؤقت أقول كلمتين لعل وعسى يحصل نوع من التوضيح، وكالعادة أنا بتكلم من قلبي وبما يرضي الله ومش بزعل من أي نقد أو تجريح لأني عارف إن دي ضريبة المكان اللي أنا فيه، ولأني متأكد إن النادي الأهلي هو مصدر السعادة يمكن الوحيدة لـ80 مليون بني آدم، فطبيعي يحصل زعل، زي لما في أي نجاح بيحصل إشادة، ودايمًا بقول مش بعرف مهما حاولت أستخبى وقت التراجع طالما بظهر وقت النجاح”.

وأضاف: “مفيش حد أبدًا سعيد بالنتائج وده كان واضح جدًا في بيان النادي إن في عملية إصلاحات كبيرة هتتنفذ الفترة الجاية، وطبيعي في أي منظومة في العالم، نادي أو شركة أو أي مكان فيه ضغوطات مستمرة، إن يحصل أخطاء نتيجة الضغط ده، الإنسان بطبيعته طول ما هو مضغوط ممكن يغلط، الشطارة إن الأخطاء تبقى قليلة ويتم تداركها سريعًا، وأعتقد إن حجم البطولات والإنجازات في الـ8 سنين أكبر بكتير من حجم الإخفاقات، ولكن ده حالنا كنادي أهلي مش بنقبل الإخفاق، وده سبب النجاح المستمر، لكن ممكن يبقى سبب أحيانًا في أخطاء”.

وواصل: “الضغط المستمر اللي بيولد أخطاء مش بس على الإدارة، ممكن كمان يكون على المدربين واللاعبين، ممكن الاختيار فنيًا يكون سليم لكن قدرة المدرب أو اللاعب على استيعاب حجم المتطلبات والضغوطات تبقى ضعيفة، وده بيحصل وطبيعي، وشفناه مع لاعبين كتير سواء لم ينجحوا أو قدرتهم على العطاء في أعلى مستوى ما كانتش فيها استمرارية طويلة، وممكن يخسرنا مدربين ولاعبين ممتازين بسبب حرصنا المستمر على عدم الإخفاق أو إعطاء فرص”.

طالع أيضًا | هشام حنفي: الأهلي “جامد”.. ودوري أبطال إفريقيا بلا قيمة بدونه

وأشار: “النادي الأهلي بيستمد قوته من جمهوره، محتاجين الجمهور يبقى كله على قلب راجل واحد، وهنا مش قصدي الإدارة، قصدي النادي، مش عايزين خناقات وتنمر على لاعيبة، مش عايزين خلافات فنية على لاعبين عشان انتصار لوجهة نظر أو حب وكره، اللي بيلعب راجل إحنا كلنا في ضهره”.

وأكد: “عايزين نبص على الكورة ككورة وكلنا نبقى وحدة واحدة، عندنا مشكلة في المدرج واتكلمت عليها، وكمية الرسائل والشتيمة اللي جاتلي مش طبيعية، بس أكدتلي حاجة واحدة إن ده ملف مهم جدًا وحساس جدًا، والله ما حد مقصر، في بس رواسب ومشاكل محتاجة وقت وثقة من الجميع، مش مهم مين يبقى موجود، مش مهم المسمى، كلنا جمهور الأهلي، من أيام ما كانت التالتة دي هي التانية دلوقتي، من أيام عم حسين ربنا يرحمه، لا كنا بنقول مين بيقودنا، ولا كان في دماغنا حاجة غير التشجيع، وكنا بنتضرب من الأمن المركزي بالخرزانات كل ماتش وبتعدي، بس للأسف كله نسي الأيام دي”.

واستكمل: “الأهلي كبير وكبير أوي، وطالما اخترنا كلنا إن طموحنا يبقى مالوش حدود، يبقى لازم نفهم إن ممكن ده يسبب أخطاء، وتاني مش بتكلم عن إدارة بس، بتكلم على لاعيبة ومدربين، وعلى الجمهور كمان، لأن طموحنا الكبير ده خلانا مش بنعرف نفرح عشان دايمًا باصين لفوق أكتر. أنا في الآخر جمهور وطالع من المدرج، وربنا يعلم أنا بحب الأهلي قد إيه، وشايف إن كلنا لازم على قد ما نضغط يبقى دايمًا ضغطنا إيجابي ويبقى دايمًا عامل نجاح”.

وشدد: “حنرجع؟ أكيد حنرجع إن شاء الله، النادي الأهلي منظومة مش بتعرف الفشل، حصل تراجع؟ أكيد حصل وبيحصل والتاريخ بيقول كده، وبالعكس على قد ما ضغط الجمهور صعب، بس لما الضغط زاد في السنين الأخيرة، العودة بتبقى أسرع وبكتير، شوفنا زمان فترات تراجع أطول وأوحش لما الضغط كان أقل”.

واختتم: “اسم الأهلي زي الجبل ما يهزه ريح طول ما الكل حاطط اسم الأهلي قدامه.. أعظم نادي في الكون”.